Olbmoborranrássi

Angelica archangelica ssp. archangelica

Olbmoborranrássi, boska dahje dušše rássi, lea guovtte- dahje golmmajagát šattu ja šaddá measta guokte mehtera alu. Ovttasuorát šattu gohčodit boskan ja lasttaid fádnun. Máŋggat dutkkit ledje fuomášan juo čuđiid jagiid dassái, mo sápmelaččat atne rási. Ruoŧŧelaš dutki Carl von Linné čálii 260 jagi dassái šattu namahusaid birra ná: “Urtas, vuosttaš jagi ruohtas, mas ii šatta nađđa. Fatno, vuosttaš jagi šaddu. Botsk, nuppi jagi šaddu. Rasi, garrejuvvon nađđa.”

Boskka galgá čoaggit mihcamáraid maŋŋá, duššefal garrestit ja vilges siskkoša borrat nuvván. Boská dáktá ja goldná maŋŋil lieđđuma ja dalle ii leat eanet čoaggihahtti. Mánát ledje hui váibmilat varas boskkaide. Boskkaid čogge stuorra meriid ja goikadeami várás luddejedje daid. Varasin daid sáhtii goardit áššus dahje vuoššat sohkkariin. Báikkuid dan leat maid sálten ja vuoššan guolevuojas dahje vuojas. Fádnuid čogge ja goikadedje, muhto atne maid ruonasborramuššan ee. sálteluosain. Fádnuid ja liđiid njuvde ja seaguhedje dálvemielkái, man seailluhedje goikaduvvon čalbmasis dahje muorralihtiin. Rássemielkeáŋkara seailluhedje galbmaádjagis.

Boskka nubbi vuollešládja, mearrarittus šaddi riddoboska (Angelica archangelica ssp. litoralis) ii dohkke biebmun iige dálkkodanávnnasin.