Čáhppesmuorji d. “muorji”

Empetrum nigrum

Čáhppesmuorji lea okta deháleamos murjjiin, danhan gohčoditge dušše muorjin. Muorjji bidje láibái ja suohkadii ja borre guolevuoivasiin ja meađđemiiguin, eanáš goit borre nuvván. Muorji ávkkuha feberii, oaivebákčasii, váibbasvuhtii ja C-vitamiinna vátnái mii dagaha skurbbeha. Guoli sihkasteapmái geavahedje dakŋasa ja dan maiddái bolde suovastit divrriid goađis dahje giehtaealliidda suodjin. Das šaddá njálgga juhkamuš juogo vuošša dahje sivrrain luvvademiin. Dálvemuorjin galge muorjjit, mat eai lean vel dipman, vai seilot buorebut go jikŋot.

Davvieatnamiin čáhppesmuorjjis gávdnojit guokte vuollešlája: lulli- ja davvičáhppesmuorji. Davvi-Suomas dábálaš uhcačáhppesmuorji buvttada measta juohke jagi buorre šattu, go fas lulličáhppesmuorji hárve šaddada murjjiid. Uhcačáhppesmuorji šaddá bures guolbaniin, jekkiin ja jalggážiin.