All Products >> Rohdot >>Muošká, muoškkás, njuohcu

Muošká, muoškkás, njuohcu

Menyanthes trifoliata

Muoškkáš, muošká ja njuohcu leat namat šaddui man ruohttasis leat maid dahkan jáffoávdnasa ja de láibon. Muoškká ruohttasa leat addán šibihiidda biebmun. Lasttaid čoaggit ovdalgo šaddu lieđđu. Goikaduvvon lasttain dahkkon deadja dahje liepma lea dálkkas skurbbehii, gološvuhtii, gosahahkii, leasmái, čoallemáđuide, borramušsuddadan-, vuoivvas- ja sáhppeváttuide ja borranlusttu buoridit. Siedjaháviid ja dihkkeoivviid leat bassan dáinna liemain.

Muoška lea čáhccás jekkiid máŋggajahkásaš šaddu. Lieđus lea ceakko gihppu, lieđit leat vilges- dahje čuvgesruksesivdnásaččat. Lasttat leat golmmasuorpmagat ja urttaš lea guhkki, starggas ja govdu. Muoška lieđđu davvin suoidnemánu beallemuttos ja lieđđun bistá sullii golbma vahku. Lieđusođju sáhttá leat juoba sullii mehterbeali guhkki, ja lasttat ja lieđus leat čázeoaivvi bajábealde. Jekkiid lassin muoška sáhttá šaddat ládduid ja jávrriid gáttiin, gos dat ovddida čázádagaid obboma.