Jeađjá, jearjá, jearji

Cicerbita alpina

Nađaid berre vuos garret, čuohppat, luvvadit čázis vai rihča doidása eret, de vuoššat ja seaguhit bohccomielkái ovttas juomuin dahje eavrruin. Nuorra nađa siskkos borrui maid nuvván dahje dolas goarddestedje. Dán áigge nađaid sáhttá maid galmmihit.

Jeađjá lea máŋggajahkásaš ja dálváda oanehis starga eananađainnis. Jeađja sáhttá šaddat juoba beannot mehtera guhkkosažžan. Lieđđu suoidne-borgemánus. Lasttat leat bárrasuoragat ja bajil measta bálljásat. Jeađjá lea viehka čoaska guovlluid šaddu, ja dat loaktá bures šattolaš goahccevuvddiin ja maiddái lagešvuvddiin.