Beatnatnjuovččarássi

Solidago virgaurea

Rási lasttaid, liđiid ja olles rási goikadit dálkkasatnui. Beatnatsuoinni leat atnán háviid dálkkodeapmái, gožžanváttuide, monimušvuolšumii ja silolaš váttuide. Luovvanan bánit čavget go njálmmi doidá vuššon ruonas lastačáziin.

Beatnatnjuovčča lea máŋggajahkásaš ja ceakkonađat. Lieđđu loahppageasi rájes guhkás čakčii. Dan davvi vuollešládja, alášbeatnatnjuovčča (ssp. alpestris) gávdno duottarguovlluin. Beatnatnjuovčča šaddá čuvges vuovddážiin, guolbaniin, rođuin, niittuin ja mearragáttiin ja maiddái duottarjalggážiin. Beatnatnjuovčča sisdoallá bárkoávdnasiid ja flavonoidaid. Dát ávdnasat lasihit cissavuožuhusa, ja beatnatnjuovččabuktagiid liigegeavheapmi sáhttá leat vahátlaš.