Sarvvajeagil

Cetraria islandica 

Jeahkáliid gierragiid ja láhpuid goikadedje, mollejedje ja dahke das jáffuid. Daid sáhtte seaguhit eará jáffuide ja láibo láibbiid, márfo dahje vušše máli.

Sarvvajeagil lea čoarvviláhkai máŋggasuorat ja das leat ramasguolggat ravddain. Jeahkála ivdni molsašuddá ruonárátnásis čáhppesruškadii. Lassána seagasnađaidis bihtáin ja maiddái iđusčalmmiiguin. Sarvvajeagil šaddá daŋasguolbaniin, duottareatnamiin ja bávttiid alde. Sisdoallá C-vitamiinna, proteiinna ja čitnahydráhtaid. Biebmoatnui dárkkuhuvvon jeahkála bardinsajiid ektui berre leat várrugas, dasgo jeahkálat čogget lossametállaid.