Horbmá d. gieganjuolas

Epilobium angustifolium

Jiereha ja horpmá nuorra lasttaid cáhpe, vušše ja seaguhedje bohccomielkái. Vilges ruohttasa maid borre. Horpmáin dálkkodedje vilgesdielkkuid, mat šadde máná njálbmái. Nuorra šattu nađaid sáhttá vuoššat ruonasborramuššan. Horpmá lasttain sáhttá vuoššat deaja. Guoli sihkasteapmái horpmá lasttat heivejit bures.

Horbmá lea dábálaččat 50–150 cm guhkki. Lieđđu suoidne-borgemánus ja lieđit leat dábálaččat alitruoksadat, muhto maiddái vilgeslieđđehorpmát gávdnojit. Dábálaš horbmá šaddá beaivvadatsajiin ja jálges eatnamiin, ja dat lávdá beaktilit. Lasttain lea valjis C-vitamiidna, ođjjuin A-vitamiidna.