Guobbariid sápmelaččat eai leat olus borran, buorebutge atnán daid dálkkasin ja biebmun ealliide. Nuortalaččat leat geavahan guobbariid ja bidjan daid duoldat guollemállái. Eandalit gusaguobbariid leat borran ná. Sáhtte vuoššat guobbariid sierra sálteliemas ja borre daninassii. Eará guobbariid leat navdán ”sáhpániid guopparin”.
Dán áigge guobbarat leat šaddan biebmoatnui máilmmeviidosaš borrankultuvrra mielde: ee. bealljeguobbarat ja gusaguobbarat leat maid sápmelaččaid málesruittuin. Japánalaččaid matsutake-guoppar lea Sámis oalle dábálaš beahcevuvddiin ja dan atnu lea easkka álggahuvvon.
