Jáffut
Soagi beassi vuolde lea rukses bárku ja das leat dahkan jáffuid. Muoškkáš, muošká ja njuohcu leat namat šaddui man ruohttasis leat maid dahkan jáffoávdnasa ja de láibon. Jeahkáliid gierragiid ja láhpuid goikadedje, mollejedje ja dahke das jáffuid. Daid sáhtte seaguhit eará jáffuide ja láibo láibbiid, márfo dahje vušše máli.
Girkoverdde Santeri Valle bássá guolbmasa uvnna ovddas áššus.
Sarviniemi, Anár 1914. Toivo Itkonen.
Beahci lea dábáleamos muorra, man guolbmasis dahke jáffuid. Jáffuid atne láibái, biergomállái, liepman ja čoavjedálkkasin. Buoremus áigi guolbmasa váldimii lea giđđat, goas das leat eanemus biebmoávdnasat. Beazi guolbmasa njalde bárkku vuolde bohcco čoarvvis dahkkon vuotkimiin. Beazi njeide dahje dikte ceaggát. Guolmmasbihtát goikaduvvojedje sámeuvnna lahkosis. Go dat goike daid goarddestedje áššus vai bihkášsmáhkka jávkkai. Goike goarddestuvvon guolbmasiid čuvkejedje dan várás ráhkaduvvon biergasiin ja nie šadde jáffut.
Guolmmastanbiergasat
Suomas guolbmasa gohčodit nealgejagiid heahtebiebmun. Nuortasápmelaččat leat atnán guolbmasa áibbas eará vugiin: dat leamaš dábálaš borramuš ja maiddái adnon herskun. Guolmmasjáffuin vušše suohkada čuotnjá dahje bohcco buoidelipmii dahje guollevudjii. Anáraččat sehkkejedje guolbmasa ee. guolle- ja biergomállái.
