Murjjiid leat borran erenoamážit varasnaga. Ovdal dain lávejedje ráhkadit maiddái ng. measttu, juogo guollemeasttu dahje biergomeasttu. Guolis ráhkaduvvui meastu nu, ahte guolis váldojuvvojedje vuos eret dávttit ja de guolli vuššojuvvui ja dasa sehkkejuvvojedje njuvdojuvvon muorjjit ja vuoššanliepma dahje mielki. Anáris lea seilon diehtu, man mielde meađđemiidge borre murjjiiguin “meađđenmeastun” nu, ahte meađđemiidda lasihuvvojedje goalmmádasa mađe sarridat. Murjjiid sáhtii lasihit maiddái guolle- dahje biergolipmii dahje guolmmasmállái dahje daid sáhtii návddašit milkkiin dahje loahppiin. Murjjiid lávejedje vurket dálvái jiekŋudemiin nu, ahte dat ledje vuojuhuvvon gáldui, mii bisui birra jagi suttisin.
Murjjiin leat olu ávkkálaš ávdnasat, nugo C-, A-, E- ja B-vitamiinnat ja buorit suvrrit, flavonoidat ja minerálat. Varas dutkamuš čájeha ahte davvišattuin leat eanet ávkkálaš ávdnasat go máddelis Suomas. Dása váikkuhit iešguđetlágan šaddandilit, beaivváža čuovgamearri ja minerálavátna eanavuođđu.
