Logo

Prošeavtta logo govvida erenoamážit sámenissona gárvvuide gullan boagánguottahaga. Namas mielde guottahaga giddejedje boahkánii ja dasa heŋgejedje burssa lassin atnudiŋggaid nugo niibbi, nállogoađi ja skieraid. Maiddái olbmát sáhtte heŋget guottahagaide meahccebivdoneavvuid. Guottahagain leat ovdan sierralágan motiivvat, main muhtimiin leat vuohttimis kristtalaš hápmegiella. Logos ovdanboahtti, orientálalaš váikkuhusaid fidnen degenereluvvan eallimotiiva, lea leamaš anus Ruoŧa Sámis maŋŋidis gaskaáiggi rájes. Dávisteaddji temái vuođđuduvvon šiervásut rieggát leat gávdnon ee. Ruošša bealde ja Guossámis. Šiervásut rieggát leat duođalágánit ob-ugralaš kultuvrra olis geavahuvvon bárggáldatheaŋgačiŋat, maid motiiva de lea stiliserejuvvon guottahahkii heivvolažžan. Seamma motiiva lea adnojuvvon guottahagain mannan jahkečuođis Suoma, Ruoŧa ja Norgga sámeguovllus.

Guottahagaid duddjojedje guovddášbáikkiin bronssas leikemiin, ja dán áigge seamma minstarii vuođđuduvvon solju lea vuovdemassii silbačikŋan ee. Inarin hopeas ja Juhls`a silbagallerias Guovdageainnus. Logo govahusain leat háliidan deattuhit sámekultuvrra árgga ja nissona rola maskulina kultuvrras ja riikkaidgaskasašvuođa, man árra gávpeoktavuođat leat buktán. Prošeavtta logo gráfalaš hámi ollašuhtii Hannu Tikkanen Tikkanen Workshopis Anáris.