Amoc ađai Mikkâl Antti Morottaja lii vijđedâm uđđâ kuávlun anarâškielâ, ko lii váldâm tom ráp-muusik kiellân. Ráp-pitái säänih já lávlumvyehi lii aggressiivlâš já joba paldee-uv, veikâ suu jiejâs luándu ij lah eissigin taggaar.

Ráppám Mikkâl Antti Morottaja algâttij vuáđuškoovlâ 8. luokast. Vistig sun ráppái suomâkielân, mut molsoi kielâ anarâškiellân. Sun halijdij, et ulmuuh kulâččii anarâškielâ, ko tom kielâ ij mudoi táátu kuullâđ masa kosten. Tááiđárnoomâ sun vaaldij eskin maŋeláá. Nommâ Amoc šadda saanijn Aanaar Master of the Ceremony, Aanaar seremoniamiäštár. Tevstâi aašijd Amoc keksee jieijâs elimist, mut toh iä aainâs taarbâš leđe tuođah.

Amocist láá táássâš lamaš oovdânpyehtimeh jieškote-uv kuávluin Suomâst, Ruotâst já Taažâst s. 80, olgomustáá Pariisist. Amoc ráppáá motomin ohtuunis, motomin Ružžein (Jukka Kangasniemi), kote meiddei ráppáá anarâškielân. Sun lii fáárust meiddei ráp-juávhust, mon nommâ lii Guerra Norte.

Amocist láá rahtum dokumeenteh television já sun lii lamaš meiddei kyessin tv-ohjelmijn.

Amoc lii fáárust čuávvoin almostittum skiärruin:
1. Hannibal ja Soppa: "Pahat viinit" -nommâsâš skiärust pittáást "Kulmat huudit: Sajeh".
2. Ezkimo: "Vaa ämcee", mast lii fáárust Guerra Norte pittáást "Se nimi pitää tuntee"
3. Čuágáldâhskiärust "Lappi itsenäiseksi" (Mixtape Vol. 1) fáárust pittáin "Suusta lentää sammakoita" já "Sankarihousut sessio"
4. Ambassa forgâpalij almostuvvee skiärust fáárust pittáin "Haulikon kantama" já "Rautanyrkki".

Matti Morottaja

Rääpi puáhtá kuldâliđ meiddei čujottâsâst http://www.mikseri.net/artists/?id=21483 Tobbeen láá kuullâmnáál pitáh "Kolleákšu" já "Val moonâm taam čoođâ".