All Products >> Tuli >>Skierri

Skierri

Betula nana

Skierri šaddá muhtumin hui suohkadin ja dan ferte garvit, eanáš dat šaddá nu vuollegaččat ahte sáhttá fal lávkut dan badjel. Skierri lea oalle dehálaš muorra go dat šaddá badjin duoddaris, ja miehtá boazoguohtuneatnama, giellasiin, jeaggebáikkiin ja njárbes vuvddiin. Dat addá dorvvu, biepmu ja beassesaji unnit ja stuorát lottiide ja ealliide. Heajosge muorjejagi šaddet luopmánat skierrasiin.

Skierri lea čoaskkes ja árktalaš avádaga šládja, ja dat leage máilmme davimus soahkešládja. Skierri lea maiddái buot unnimus soahki. Dat šaddá eatnanlabi ja suhkkes daŋasin dahje eanemustá mehterallosaš miestagin. Lasttat leat unnit, jorbasat ja stuorrabánagat, ruškki áigge dat leat ruoksadat dahje ruksesfiskadat. Sámis skierri šaddá duottareatnamiin, jekkiin ja vuovdeguolbaniin, máddeleabbos lagamustá muorrašattot jekkiin.