Majemui ivij tobdosumos anarâšmuusik rähtee lii lamaš Piäkkáá Avni. Kuhesáigásâš muusik já tiivtâ rähtim poođij uáinusân 1990-lovvoost, ko sun riemâi muusik almostittem kuovttijn C-kasettáin. Tah láá ive 1994 almostum Äijihkeđgi já ive 1998 almostum Kuurâh kullui. Majemuuh olgosadalduvah pottii ive 2004. Toh láá anarâškielâlâš CD-skiärru Pálgáh já suomâkielâlâš CD-skiärru Pohjoisen mystiikkaa.
  
Piäkkáá Avni ana áárvust anarâškielâ pyereestheivimvuođâ eromâšávt lavluu já tiivtâ kiellân, ko tot lii jienâdâhráhtusis peeleest lines já sänivuárhás peeleest valjaa. Ive 1991 almostittui Piäkkáá Aavni (talle suhânoomáin Vesa) tihtâkirje Uáináh-uv ― Oainnátgo, mon koveh láá olášittum oovtâst luándukovvejeijee Martti Rikkosáin.

Muusik já tivtâlâšvuođâ lasseen tobdoo Piäkkáá Avni kovetaaidârin maaŋgâmuđušijguin installaatioidiskuin sehe nukkestelliildâsâidiskuin, moi vievâst sun kovvee eromâšávt anarâšulttuur já luándu koskâsii vuáruvaikuttâs.

Párnáikulttuur já anarâšvuotâ láá lamaš Piäkkáá Aavni taaidâlâš tooimâst merhâšittee saajeest já sun lii eres lasseen toimâm lohhen Säämi Radio párnáiohjelmijn sehe ráhtám installaatioid čuovâkovekuuvviittâssáid párnáikirjijd Tuálu faŋgâ (tekstâ Aune Kuuva, 1994), Suábi maainâs (tekstâ Petter Morottaja, 1999) já Riävskánieidâ (tekstâ Petter Morottaja, 2000).

Marko Jouste